جبـل العرب

نلتقي لنرتقي ،، !!
 
الرئيسيةالتسجيلدخول
شاطر | 
 

 رواد الزجل اللبناني

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
يونس محمود يوسف
مشرف قسم الشعر الزجلي
مشرف قسم الشعر الزجلي


جنسيَ »: ذكر
مشآرگاتيَ »: 765
عمريَ »: 49
نقآطيَ »: 26881
تآريخ التسجيــل: 06/01/2010

مُساهمةموضوع: رواد الزجل اللبناني   الجمعة أبريل 09, 2010 12:10 pm

الأغضاء الكرام في منتدى جبل العرب
هنا أكتب لكم موضوع هو رواد الزجل اللبناني وسأعرضه تباعاً ليتمكن القاريء الكريم من متابعته وربما يكون موضوع طويل لكثرة الشعراء الزجليين وأرجو ان ينال إعجابكم وهذه الفكرة أوحى بها غلينا الشاعر الجميل راند نادر الشكر الكبير له

اليوم اكتب لكم عن شاعرين كبيرين عمالقة في الزجل هو الشاعر خليل روكز والسيد مصطفى تابعوني

خليل روكز
أستاذ الشعر الغنائي
ولد خليل روكز عام 1922 في وادي الليمون جزين لبنان

ارتجل الزجل اللبناني في سن الثامنة عشرة من عمره

صعد المسرح الزجلي عام 1944

يتبع

ألف جوقة الزجل اللبناني عام 1956

توفي عام 1962

يعتبر خليل روكز أحد أهم وأبرز كتاب الزجل في تاريخ لبنان الحديث
وسميت أهم جوقات الزجل في تاريخ لبنان باسمه وكان من أعضائها
موسى زغيب
أنيس فغالي
جريس البستاني
بطرس ديب

توفي في أوج عطائه وهو في سن الأربعين
تاركا مجموعات شعرية هامة منها
حرمان= ابن الحرمان= كفر وايمان= هند وجميل= دموع الطير= النسمات= القمر= روحين= يقظة الأحلام= مع المغتربين= الأسرار
وبعد وفاته قانت لجنة بطبع جميع أعماله بديوان كبير
سمي ( ديوان خليل روكز)

من ديوانه هذا اخترت لكم هذه القصيدة


يا حلوي يا كحل العين لا تزوري العين بمرة
استغني عن مزراب العين ومن عيني عبي الجرة

قلبي بحكيلك عنو بحبك نهداتي تغنو
ومهما تبريتي منو من حبك ما بيتبرى

شفت الزنبق والمنتور عن دربك بيلمو عطور
انت بسمة فجر النور وع جبين الكوكب غرة


موال

أنتِ شتلة الزنبق ونامي وع حبك قلبي مفرفح ونامي
اعملي دموع الندى فراشك ونامي حرام العطر يغفى ع التراب

تلركتيني ملوع مقهور وغبتي أربع خمس شهور
وقلب البيحبك مجبور كل يوم يشوفك مرة

ومن روائع ما كتبه ايضا وهو على فراش المرض قبل وفاته بقليل
هذه المقطوعة المنشورة بخط يده

بين الوجع والبنج والسرساب ضايع وناطر تسألي عني

لا سمعت دعساتِك ولا البواب شافك ولا الدكتور طمني

مغلشن وبجروحي خزيق سياخ وحس الفضا بفتحة عيوني داخ
وبخيال نوبات البكي والآخ سامع صدى صوتِك عم تغني

ونهدات تزرع دوختي مشاوير واتشردق بسعلة طويلي كتير
ويشدني حلم النزاع وطير ليكي وانتي تهربي مني

يعتبر خليل روكز أهم شعراء الزجل اللبنانيين الذين يرتجلون الكلام

غنى من كلماته كبار الفنانين في لبنان ومنهم فيروز في البدايات
الشاعر محمد مصطفى
محمد مصطفى السيد((أبو مصطفى))) أو السيد متل ما بيحب يندهولو وبيندهولو ::

ولد السيد بحومين التحتا بجنوب لبنان 1922 ,,,وتشرب نهج البلاغة والقران الكريم من صغر سنو,,,,فصار عندو خلفية لغوية وثقافية لا يستهان بها أبدا ,,,,, ظهرت موهبتو بعرس من أعراس الضيعة وكان حاضر الشاعرين الكبيرين عباس نجم الحوميني ,,,,وعلي الحج القماطي ((من الجيل الأول )) فقالولوا طلاع يا سيد ارتجل ردة موشح ,,,فكر السيد وقال


,,,,,,,,,,,,,,,,,,,,,,,,حسنك ملكك أو سرقة______يا ست الغيد___

,,,,,,,,,,,,,,,,,,,,,,,,,,,,رصعتي نجوم الزرقة_____في در الجيد

وقامت الدنيا وقعدت ,,,هالولد الصغير بيقول هيك ؟؟؟؟؟

ورجعت الأيام وبيغير مناسبة ,,,ذكرت ردة الشحرور المشهورة تبع المهر ,,,,قام قال السيد::

ركبت مهري لبست درعي والدرق خاض العجاج فج الصفوف جخ ومرق

لاح ديلو عاليمين وعالشمال وكل شعرة كتفت أربع فـــــــــــــــــرق


وبيوم من الأيام بالغازية تبارى مع علي الحج وكان السيد ابن 13 أو أصغر قام تفوق بالتحدي ,,,,قام علي الحج قال ردة اخرها ,,,أنو لو خيروه بين كل الجيل الجديد

________________ما بصطفي إلا محمد مصطفى___________________

واول قصائده هي قصيدة مي بالفصحى ,,,,


انضم السيد لجوقة خليل روكز فكان أوفى الأصدقاء لخليل وخليل ما يحب حدى قد السيد محمد ,,,

ألف جوقة خلود الفن وكانت من الجوقات الأولى في مجال التحدي ,,,,,

وشعراءها :::السيد محمد مصطفى____خليل شحرور____ علي شريم______ يوسف أنطون

وأيضا :::السيد محمد مصطفى ____ خليل شحرور ____ جورج بو أنطون ___ خليل عياش

وأيضا :: السيد محمد مصطفى____ إميل أبو شقرا ___ خليل شحرور ___ علي شريم,,

ويقال أنو اسمها صار بنت العرزال ,,,,,

السيد محمد مصطفى شاعر الجنوب شاعر التحدي غنا الغزل غنا المقاومة غنا الديانة غنا ثقافتنا,,,,,,فبرع بالكل ,,


وغنا التحدي فكان الأول بالتحدي ,,,,ومتل ما قال سعيد عقل عن السيد مصطفى ((((السيد محمد مصطفى شاعر لا يبارى )))))

ومتل ما قال أحد الباحثين بالزجل اللبناني (((((السيد محمد مصطفى الرقم الصعب بمعادلة الزجل اللبناني))))

انشهر بقوافيه المعقدة الصعبة الساكنة فكان يتحكم فيها ويلعب فيها متل ما بدو ,,,

انشهر بالموضوع فكان بخير الخصم وياخد الصعب ,,,متل موضوع صح وغلط صحة ومرض فوق وتحت نقطة وبحر قناعة وطمع ,,,,وكتير كتير ,,

اشتهر بالتحدي ,,,,فكان من أقوى شعراء التحدي ودور عركات شعرية خالدة كان فيها الراس ,,,وأقوى مبارياتو

الكرمنيك مع خليل روكز ,,,,جباع مع خليل روكز وعبد الجليل وهبي الباريزيان مع خليل روكز ,,,,الكرمنيك مع زين شعيب والغازية مع طليع ,,والغازية مع زين والغازية مع خليل شحرور والغازية مع موسى زغيب المدينة مع الزغلول وزفات وحبوش مع الزغلول والكرمنيك مع زين شعيب,,,وكتير من الحفلات ,,,,,,,
ومن مبارة بين السيد وخليل روكز أخترت لكم هذه المقطوعات


السيد محمد مصطفى::


شعار نحنا منحفظ أصول الوفا,,,,,,,,,,,,, وحتى نقول الحق عنا ما اختفا

ضربني ثلاث ضربات منك يا خليل ,,,,,,,,,,,, وخود ضربي من محمد مصطفى


خليل روكز::
يا قاصد تفرفر ومقصوص الجناح ,,,,,,,,,,,, وعزمتني اضرب عجسمك بالرماح

ليش حتى اضربك ما زالني ,,,,,,,,,,, لما بطلع فيك بتزت السلاح

السيد محمد مصطفى ::

عزمتك تا تضربني ولكن مستحيل ,,,,,,,,,, بتقدر تسل السيف والماضي ذليل

ولما شفت لونك وكسرة عينتيك ,,,,,,,,,, فضلت زت السيف حدك يا خليل


خليل روكز::

يللي نظرت الحظ حتى يقوتك ,,,,,,,,,, سيفك وقع منك وخوفك موتك

ومازال ضعفي أجبرك ترمي السلاح ,,,,,,,,,, بدي بضعفي صرت حارب قوتك


السيد محمد مصطفى::

غشيت نفسي وجيت حتى قاربك ,,,,,,,,, سيفي استحى والضعف كسر قاربك

حاربتني بالضعف أقوى سلاح فيك ,,,,,,, تا يصير عندي ضعف ببقى بحاربك


خليل روكز::

روح اشتريلي ضعف من دهر الشقي,,,,,,,,, وخود مني كل شي بجسمي بقي

وأنت انصح قد ما بضعف أنا ,,,,,,,,, في وقتها معقول نرجع نلتقي


السيد محمد مصطفى::

عقول الضعيفة هويتها وعشقتها ,,,,,,,,,,,, شو طمعك تا تزينها قبال الجبال

استذوقت زهرة يابسة تنشقتها ,,,,,,,,,,, وتركت زهر يفوح بالسحر الحلال

حاربتني ونفسك بناري حرقتها ,,,,,,,,,,,, بضعف المجال كتير نصحت المجال

بضعفك ونصحي منلتقي في وقتها,,,,,,,,,,,,, بتبع كلام القال لا تحارب خيــــال


خليل روكز::


لو كل شي في فيتامين بتشربو ,,,,,,,,,,, وبتصير صنين بكفوفك تضربو

ولو بتحمل الأجيال تقلة دينتك,,,,,,,,,,, ومنبهك غطى النجوم بعقربو

ولولا عاعين الموت رجحت عينتك,,,,,,,,,, وبعبستك للكون قادر تخربو

بيضل لو اسمي مرق عا دينتك ,,,,,,,, قلبك بيوقع والسباع بيهربو


الرجوع الى أعلى الصفحة اذهب الى الأسفل
القرنفال الأحمر
الادارة العامة
الادارة العامة


جنسيَ »: انثى
مشآرگاتيَ »: 11342
نقآطيَ »: 49655
تآريخ التسجيــل: 06/05/2008

مُساهمةموضوع: رد: رواد الزجل اللبناني   الجمعة أبريل 09, 2010 12:14 pm

معلومات هامة وقيمة
تثبت لتعم الفائدة
اشكرك أخي أبو هاشم
مع الاحترام والتقدير


الرجوع الى أعلى الصفحة اذهب الى الأسفل
فارس بلا جواد
الادارة العامة
الادارة العامة


جنسيَ »: ذكر
مشآرگاتيَ »: 9758
عمريَ »: 45
نقآطيَ »: 47969
تآريخ التسجيــل: 01/06/2008

مُساهمةموضوع: رد: رواد الزجل اللبناني   السبت أبريل 10, 2010 11:20 pm

و الله موضوع مميز و رائع جدا

الف شكر لك




و الله اني لأستحي من فضل الله علي

الحمـــــــــد لله رب العزه و العرش
الرجوع الى أعلى الصفحة اذهب الى الأسفل
http://qisip.com/
يونس محمود يوسف
مشرف قسم الشعر الزجلي
مشرف قسم الشعر الزجلي


جنسيَ »: ذكر
مشآرگاتيَ »: 765
عمريَ »: 49
نقآطيَ »: 26881
تآريخ التسجيــل: 06/01/2010

مُساهمةموضوع: رد: رواد الزجل اللبناني   الأحد أبريل 18, 2010 12:26 pm

وهنا أكتب لكم عن شاعرين جديدين من رواد الزجل اللبناني
زين شعيب أبو علي
وجزيف الهاشم ( زغلول الدامر )


الشاعر زين شعيب (1924-2005)

زين شعيب - أبو علي:-ولد زين شعيب في بلدة الشرقية عام 1924, نشأ والشعر على ألفة فتناغيا وترعرعا معاَ, في السابعة من عمره فتح للشعر صدره واحتضنه يافعا, فكان الشعر وفيّا لذلك الاحتضان, فملّكه زمام أمره وانقادت له قوافيه فملك أمرها وقوّم اعوجاجها, تحداه الكثيرون فامتاز عليهم وأصبح شاعر الارتجال بلا منازع.
في بدايات طلته على مسرح الشعر الزجلي وقف الشاعر زين شعيب قبالة أحد عمالقة الشعر الزجلي علي الحاج القماطي ورد عليه:
يا علي، عا بو علي لا تعتلـي= ساحة علي التلتين بالطّابو إلي
صرلك عا كرسة هالزجل خمسين= عام وبعدك علي، ما صار اسمك بو علي
انتقل الشاعر الى بيروت ليؤلف مع الشاعر خليل روكز فرقة صغيرة تحيي الحفلات العائلية. ثم تعرف الى الشاعر جوزف الهاشم المعروف بزغلول الدامور وألفوا جوقة.
يقول الشاعر نديم إن والده كان له الدور الأول في نقل الشعر الزجلي من الريف الى المدينة، حيث بدأت تقام الحفلات في صالات السينما وقاعات المسرح. وفي هذا الوقت تحديداً أنجز الراحل نقل ردّ المعنّى من سطرين الى أربعة أسطر او الى ستة أسطر، حتى اعتمد كذلك

وعندما بدأ العدوان الإسرائيلي كانت قصائده متراساً للدفاع عن الجنوب، وبندقية تتقدم لقتال المحتل. نستطيع ان نقول عن "أبو علي" إنه شاعر أول من شعراء المقاومة".
من قصائده في المقاومة:
يا جنوب يا أغلى من الغالي
يا أرض خضرا يا جبل عالي
يا مقاومة عالضيم ما بتنام
عكل تلة مدفعك صالي
يا شعب صابر على الآلام
يا جروح ما بتروح من بالي
صخورك بوجه المعتدي أعلام
والسنديانة رماح قتالة
بإنجيل عيسى ومصحف الإسلام
جنوبك سياج وأرزك شمالي
جاهدت حتى تعبت الأيام
لكن إنت ما تعبت يا غالي
حتى اليتامى الفيك مش أيتام
هودي بقايا جروح سيّالة
حدودك سما وحبك صلاة وصيام
إنت خلقت إلنا الحما والعرض
نحن إلك يا جنوبنا الغالي.
الراحل الشاعر زين شعيب علامة فارقة في الشعر الزجلي في سجله الزاخر.. ومن مؤلفاته: الشجرة الطيبة، المرج الأخضر، مع المغتربين، بين القلوب، بين الأرواح، أفكار، حلم سجين وديوان شعر.
ـ نال الشاعر زين شعيب وسام الاستحقاق من رئيس الجمهورية عام 1974.
ـ قُلد وسام الأرز الوطني من رتبة فارس في عهد رئيس الجمهورية إلياس الهراوي في احتفال أقيم في القصر الجمهوري عام 1997.
ـ نال وسام تقدير من وزارة الثقافة عام 1995.
ـ مُنح وسام شرف وتقدير من المجلس الثقافي للبنان الجنوبي عام 1995.
ـ نال درع تكريم عمالقة الشرق من لجنة تخليد عمالقة الشرق برعاية رئيس مجلس الوزراء الرئيس الشهيد رفيق الحريري عام 2002.
ـ كرّمته الحركة الثقافية في لبنان عام 1996، وقلده مركز كامل يوسف جابر الثقافي وسام تقدير في العام 2001، ومجلة شؤون جنوبية عام 2004
من قصائد الشاعر زين شعيب- ابو علي

غزليات
قالوا كبرت يا بو علي والعمر فات
ويمكن صرت عاجز تأدّي الواجبات
كان لك زمان تغازل زهور النبات
وتفيّق النسر اللي بقلب الوكر بات
قلتلهن وحياة كل الآنسات
وكل شي خلق الله حلو ومرطّبات
بعدني لولا كمشت شلف الحديد
وقت اللي بدي بعملو غزل البنات
***
اللي بيكون عندو مال بيموّن جموع
ليش حتى ينحرم ويموت جوع
آدم كسر ضلعه وعمل منّو مرا
لنّي محلو بكسر الأربع ضلوع


شحاد
يا مين ع شحاد يهديني
منشان سرّ الكار يعطيني
لا مال بدّي ولا برزق طمعان
ولا مقصدي ضيعة ولا مديني
بدّي عصا من قرمة العميان
اتعكّز عليها بتكفيني
وادّروش وأبرم على الجيران
وع كل عتبه ينحني جبيني
شحاد بشحد عاطفة وتحنان
من اللي جرح قلبي وناسيني
وبتنهنه بغصّة طفل عطشان
قلبي احترق يا ميمتي اسقيني
شحاد بشحد كحلة الغزلان
من عيونك اللي فيهن قتلتيني
وبشحد لك الغفوي من النعسان
حتى تنامي يا تقبريني
وبطلع على بشري حمى جبران
بقلّو ع سلمى دخلك هديني
بحبش ونبّش بهالجدران
ع شي عبارة حبّ ترضيني
وبرجع وبستنّى شهر نيسان
وبقول بكرا الخير جاييني
بشحدلك من الورد والريحان
ووين ما دعستي تقشعي زيني
وبكتب من الإنجيل والقرآن
حجابات فيها دينك وديني
بلكي بتجي وبتطردي الشيطان
واللي حضى يعقوب يحضيني
قبلي وبعدي ما انظلم انسان
ع قدّ ما بحبّك ظلمتيني
لو كان قلبك من صخر صوّان
حلّو يلين الصخو وتليني
وراضي لا والله مش زعلان
وأعوام بقبل لو حكمتيني
ع شرط إنت تفصّلي الأكفان
وإبقي ع قبري بالسنة مره
حسنه لوج الله زوريني


من المحاورات

عرشي بقفاص الحلوين
برصاص الدمدم مخفوق
وجوهرتك من ميّ وطين
فخّار مزوزق محروق
ونحنا متل البياعين
الفتحوا السوق بجنب السوق
راسي سوق الصياغين
وراسك سوق النوريه

***

اللي تنهّد قلبو يا شريك
لما الدره بانتلو
رح قلّو الله يشفيك
وازرع شتلك مع شتلو
هيدا متلك عقلو سميك
يا عقلك طالع متلو
زردة باب كتيري فيك
وجايي عاسوق الألماس
تلبس دره ملوكيه

***

ببحر الدراري بالمواج مسيّجي
والموج سيف بإيد فارس حربجي
بستقبل الميّ النقيه المبهجي
البتكون أطهر من وراق بنفسجي
الميّه البتكون عكره ملجلجي
والغش زاغلها بإبرة مبنجي
بترجع إلك والبحر ما بيقبل زغل
إن ما كنت صافي القلب صوبي لا تجي

زغلول الدامور:-ولد جوزيف الهاشم زغلول الدامورفي بلدة البوشرية قضاء المتن سنة 1925 والده مخايل الهاشم من الدامور ووالدته سيسيليا جرجورة العيراني من عاريا. تلقى علومه في مدرسة جديدة المتن الكبرى التي كان يديرها الخوري الشاعر يوسف عون وكان من التلاميذ المجلين وفي سن التاسعة تفتحت لديه موهبة الشعر فكان يفترش الأرض بين الصنوبر حاملا قلما وورقة يدون عليها ما يتفتق له من ابيات يرددها حتى اصبح معلموه و رفاقه يقولون فيه :"هيدا الصبي ابن الداموري مزغلل وعم يكتب شعر " ومن يومها عرف بلقب زغلول الدامور.

كيف كانت البداية مع الزجل؟

ـ كان حفل توزيع الشهادات في المدرسة وكان الأستاذ والشاعر وليم صعب سيقدّم حفلة مع أديب حداد (أبو ملحم)، وأذكر تقديم مسرحية "الأجنحة المتكسرة" لجبران خليل جبران... المهم أن مدير المدرسة الأب يوسف عون كان يعرف أنني أغني الشعر فأرسل في طلبي قبل يوم من الحفل وقدّم لي قصيدة زجل كتبها وليم صعب لكي ألقيها عند تسليم الشهادات في اليوم التالي وهي كناية عن مديح بمدير المدرسة... أخذت القصيدة وحفظتها في الطريق إلى البيت، وحين وصلت أخبرت أبي بما جرى فاشتاط غضباً وقال لي "صار عندك شهادة وبدّك مين يكتبلك" وأمسك القصيدة التي كانت مكتوبة على ورقة واحدة ومزّقها.. كاد الدمع يطفر من عينيّ.. ثم قال لي ما بدّي ياك تروح على المدرسة... ومساء ذلك اليوم جاء وقت العشاء وكنا نجلس جميعاً على الأرض فمنعني أبي من الجلوس.. قال لي تجلس في الزاوية هناك وتكتب قصيدة ثم يسمح لك بالعشاء.. وهذا ما كان.. انبطحت على الأرض وبدأت بالكتابة وما ان أنهى اخوتي العشاء حتى أنهيت القصيدة وأريتها لأبي فضحك وبدت على وجهه علائم السرور وقال لي "الآن يمكنك تناول العشاء".. في اليوم التالي ذهبت إلى المدرسة.. كنا خمسة نحن الناجحين.. وقام الأربعة الآخرون بإلقاء كلمات نثرية ثم جاء دوري لكي أصعد إلى المنصة.. وقفت وغنّيت الأوف بالطريقة نفسها التي أغنيها اليوم، فابتهج الجمهور وبدأوا بالتصفيق ثم قلت قصيدتي، وكنت أنظر بطرف عيني إلى مدير المدرسة الواقف في الكواليس مترقباً ردة فعله التي توقعت أن تكون غاضبة لأنني لا أغني القصيدة التي يتوقعها.. فوجدته غاشياً بالضحك.. وكانت جدتي أيضاً موجودة بين الحضور وكانت مسرورة جداً فعرفت أنني زمطت..

ـ هل تذكر القصيدة؟

ـ بالطبع.. لكنني سأقول لك أولاً قصيدة وليم صعب التي كان يغلب عليها الكلام الفصيح مثل الكثير من زجل تلك الأيام..

يقول صعب:

"أُم الهدى والعلم نادتنا ونسمع كلام الإم عادتنا
في وجهنا ضوّت سبيل النور وقوّت مبادينا وإرادتنا
وبروضها عدنا اجتمعنا طيور تا نزيد ع الماضي إفادتنا
بقلوب مليانة وأمل وسرور وعيون تحكي عن مودّتنا
شهدنا عليها وشاهد الجمهور والفضل شاهد في شهادتنا"

أما قصيدتي فتقول:

"يا أب يوسف عون هادينا حتى نقدّم فرضنا جينا
نحنا دخلنا لمعهدك قصّار وصرت الغذا من الروح تعطينا
نحنا دخلنا لمعهدك قصّار كبرنا وصرنا بالعلوم كبار
علينا كنت سهران ليل نهار ولقّبوك الناس بالكرّام
تغرس علومك في أراضينا لقّبوك الناس بالكرّام
نقّيت من شعرك اليباس عرّام ما كنت في ماضي السنين تنام
ومن صميمك كنت تزرع حَبّ ونحنا زهور بروضك بقينا"
من صميمك كنت تزرع حَبّ حب الذكاوة والوفا والحب
تا صار روضك متل كرم الرب ونحنا زهور بروضك بقينا"

ـ زين شاعر مرجلة وأنا شاعر نعومة.. كان زين يتمرجل ويهدّ ويقدّ.. فآتيه أنا على الناعم وروّحلو كل المرجلة.. مرة قال لي هذه الردة:

"معروف عني بالزجل والمقدرة شيخ الشباب وما رجعت فشخة لورا
بالمقبرة لو كان الي ميت سني دعسة مرا بتقيمني من المقبره"


فجاوبته:

" زين اللي عنّو خبّر الدهر وروى تزوّج خمس مرات بليالي الغوا
من المقبرة دعسة مرا بتفيقو كيف الخمس نسوان لو مرقو سوا"

مرة أيضاً كان يعتد بنفسه:

" تلاتي بجبل لبنان بيغنّوا زجل زين وأنا وإنسان اسمو بو علي"

فجاوبته:

" لو قلت عن حالك زكي وشاعر فطين بتلات أسامي طيّبين وميتين
بتكون حامل بالزجل يا بو علي تلات تذاكر والتلاتي مزيّفين"


من قصائد زغلول الدامور


زجلنا

زجلنا الما لنا عيشي بدونو
رح تدبل زهوره على غصونو
بأيـّا شكل وبأيّا طريقه
من نياب الخطر لازم نصونو
اعذروني ان كنت عم بحكي الحقيقة
يا مسؤولين سهرانين كونو
قبل ما نوقع ويوقع بضيقه
زجلنا لازم نمكّن حصونو
بيجي كل مطرب يغش الخليقه
وبيصير يجنّ ع المسرح جنونو
ويترقوص على صوت الموسيقى
متل شي قرد ع الشجرة يا نونو
وألف دولار يقبض بالدقيقه
ع نتف حواجبه وكحلة جفونو
ع شو؟ ع لحم غنيه عتيقه
أو تا يلعب بعقل الصبايا
بشعراتو وبتدبيلة عيونو




من حماسيات الزغلول

أنا الورد اللي بوّستو بتمّو
الهوا ممنوع من بعدي يشمّو
وبكل مناسبة مثبّت وجودي
وإذا بيوقاع نصّي ما بلمّو
أنا روحي مع صحابي ودوده
النصر من هون لوّحلي بكمّو
وع خشبة منبري ان شكّيت عودي
عمالقة الزجل حدّي بيزمّو
القوافي رخاص وأفكاري فروده
البحر ببيوت قصداني بطمّو
اللي فكّر بالشعر يلوي زنودي
بعد بيّو ع امّو ما تعرّف
ولا تصوّر جنين ببطن إمّو

__________________


وسأكتب تباعاً بعض المحاوراة التي أتمكن من جمعها هنا

الرجوع الى أعلى الصفحة اذهب الى الأسفل
عمادالقنطار
كبار الشخصيات
كبار الشخصيات


جنسيَ »: ذكر
مشآرگاتيَ »: 8869
عمريَ »: 34
مكآنيَ »: السعودية
نقآطيَ »: 41359
تآريخ التسجيــل: 31/05/2009

مُساهمةموضوع: رد: رواد الزجل اللبناني   الثلاثاء أبريل 20, 2010 8:34 pm

والله شي رائع
سلمت يداك
وننتظر المزيد
مشششششششششششششششششششششششششششششششششكورين
الرجوع الى أعلى الصفحة اذهب الى الأسفل
رائد نادر
عضو مجتهد
عضو مجتهد


جنسيَ »: ذكر
مشآرگاتيَ »: 153
نقآطيَ »: 25479
تآريخ التسجيــل: 24/01/2010

مُساهمةموضوع: رد: رواد الزجل اللبناني   الجمعة أبريل 23, 2010 4:57 pm

[b
]الشاعر يونس

كل الشكر والتقدير لكم على المعلومات القيمة التي تتحفتنا بها

وهذا ان دل على شيء فهو يدل على طيب الأصل

مشكور جدا مرة أخرى ولو أثقلنا عليكم

بالمناسبة : لقد بحثت على النت عن مراجع مختصة بموضوع الزجل وتاريخه وشعراؤه وووو..

فلم أجد الا القليل ... والشاعر يونس زودنا اليوم بمجموعة رائعة من المعلومات التي فعلا لم نجدها في النت ...

تحيه عربية معروفية ... خالصة ....
[
/b]
الرجوع الى أعلى الصفحة اذهب الى الأسفل
سيرين
مشرفة أقسام الأغاني
مشرفة أقسام الأغاني


جنسيَ »: انثى
مشآرگاتيَ »: 1408
نقآطيَ »: 29019
تآريخ التسجيــل: 29/10/2009

مُساهمةموضوع: رد: رواد الزجل اللبناني   الجمعة أبريل 23, 2010 8:23 pm

شكرا علي المعلو مات القيمة


جون لينون : " الحياة هي ما يحدث لك وأنت مشغول بخطط أخرى".
الرجوع الى أعلى الصفحة اذهب الى الأسفل
يونس محمود يوسف
مشرف قسم الشعر الزجلي
مشرف قسم الشعر الزجلي


جنسيَ »: ذكر
مشآرگاتيَ »: 765
عمريَ »: 49
نقآطيَ »: 26881
تآريخ التسجيــل: 06/01/2010

مُساهمةموضوع: رد: رواد الزجل اللبناني   الأحد أبريل 25, 2010 6:22 pm

أهلاً بكم جميعاً وأتمنى أن يعجبكم هذا الموضوع

والشكر لجميع الأعضاء الذين تكرمو بالمرور


أخوك أبو هاشم
الرجوع الى أعلى الصفحة اذهب الى الأسفل
يونس محمود يوسف
مشرف قسم الشعر الزجلي
مشرف قسم الشعر الزجلي


جنسيَ »: ذكر
مشآرگاتيَ »: 765
عمريَ »: 49
نقآطيَ »: 26881
تآريخ التسجيــل: 06/01/2010

مُساهمةموضوع: رد: رواد الزجل اللبناني   الخميس يناير 27, 2011 7:06 pm

طليع حمدان أحد أبرز رواد الزجل في عصرنا وسيد المنبر عمل بجوقة زغلول الدامر طويلاً وكون جوقة اليوم اسمها جوقة الربيع
ولد الشاعر طليع حمدان عام 1944 في قرية عين عنوب في الشوف اللبناني
له أربع أبناء
شادي \ خزام – سحر – زينة
أول ما غنى عام 1966 مع أبو علي زين شعيب وعمل مع زغلول الدامرو لمدة عشر سنوات
وألف جوقة الربيع عام 1975
من أشعاره


مبارح متل هلق

مبارح متل هلّق سوا كنّا
وكان الورد فينا وطلع منّا
وتمو التحنّا بخمرك المعصور
جايي عَا بالو اليوم يتحنّا
ضيّعت صوتي بصوتك المسحور
لما سوا إحساسنا تغنّا
متل السوا سمعو غناني طيور
وما بيعرفو مينو القبل غنّا
ملتي عليي خصر صرنا خصور
وشفي جنا عاشفة الجنّا
وكل ما شربت من جدول المنتور
قلو بعد ويقول بتمنّا
كان الهنا ما زارنا من شهور
وكان فينا بعد نتهنّا
بكير لحظات اللقا المحرور
خلصو تَا فلينا غصب عنّا
وفَلّ يوم مبارح ومقهور
ليش دخلك فَلّ يتأنا
إلنَا بَنَى بيت بزهر وعطور
واليوم راح البيت والبنّا
بكرا تعي دموع الربيع نزور
يما مع شفافك يجو لعنّا
يعصرهن علينا صباح النور
ومع بعضنا من جديد يعجنّا
والحب يخبرنا على تنور
عَا آخرو نزدلو حرف منّا
تَا يصير تنوره ملاني زهور
كنا سوا فيها أنا وإنتي
ومعها رجعنا متل ما كنا


حوض ورد

حكيتي معي والشوق لهفّتو
عَا لحن لا سمعتو ولا عزفتو
من صوتك عرفتك حنوني كتير
وكل البعد ما بعرفو عرفتو
عرفت فيكي ليل ومشاوير
وفيكي فجر طالع بهفهفتو
وفيكي الربيع محمّمك بكير
وجايبلك من الزهر منشفتو
لكن أنا سبقتو حلم عَا سرير
شربت الندى عليكي تا نشّفتو
ولقيت فيكي طير ما بيطير
وحدو مخبّا بريش عاطفتو
وحلِمت فيكي حبوب للتخدير
منهن عَصَرت نبيذ ورشفتو
وحلمت فيكي حوض ورد زغير
شميت عطرو بس ما قطفتو
ومنديل عن تمّك بلا تفكير
زحتو حلتمك طفل كشّفتو
وبكرا إذا يقظه الحلم بيصير
بقلّك لقيتك متل ما حلمتك
وشفت اللي شفتو قبل ما شفتو


الرجوع الى أعلى الصفحة اذهب الى الأسفل
 

رواد الزجل اللبناني

استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
جبـل العرب ::  :: -