أبو جدعان- أبو جدعان حبيب قلبي وكبدي ما في غيرك نصير الحق ، قاصدك عيوني .
* أبشــــر ، لعيونك أبو فهمي ، أنت بتأمر يا غالي .
- بدنا صوتك المضمون والمصون بالانتخابات .
* وحياة شواربك ما بصّوت غير إلك ، ما شاء الله بدنا أحلى منك طول وشوارب
وأناقة وجمال وثقافة وأدب ، ليش شو ناقصك حتى تفوز .
- يا معّود ما في غيرك بيفهمني ، المعركة حامية الوطيس وأنا بثق فيك.
* اله معك أبو فهمي روح ولا تحمل هم لعيونك رح نشرب دم ..شو يعني وطيس .
(( ..................................)) وبعد قليل ....
- السلام عليكم .. هات راسك نبوسه حبيب الشعب أبو جدعان العظيم .
* له له يازلمه .. حياك الله أبو لطفي تفضل يا أخي المحبة زايده هاليومين.
- أخووووي ... أبوجدعان قاصدك ..ألك ولاّ للذيب.. أأخووووي .
* شِف ....تخسى الذيب أبشر لعيونك يا زلمة ... وك شوباك خبرني .
- الانتخابات .. بدي صوتك الرائع بالانتخابات .. يا أخي المعركة حاميه .. وأبو فهمي الأفندي مرشح حالو ضدي ومفكر حالو شي ...وأنت يا أبو جدعان سيد العارفين مين أحسن أنا ولا ّ هوي ...لك حتى زوجتي صارت ضدي .
* شراب مي وارتاح أبو لطفي حاجي تضوي وتطفي ، فشر أبو فهمي وحياة عيونك ما بصّوت إلا إلك .. صحيح ما عندك أدب ( عفواً) قصدي ثقافة ...بس عندك فلوس أخي .
- ألف ... ألف شكر وهيك ( صاروا ألفين ) ..وما رح أنساك بالمجلس أبو جدعان.
* الله معك أبو لطفي طمئن بالك ... انتبه .. انتبه على الدرج وأنت نازل .... روح لك تضرب منك إلو .
(( .....................................)) وأثناء الانتخابات.
في مركز الاقتراع يخرج أبو جدعان من خلف الستار السري حاملاً بيده ورقته الانتخابية وقد كتب عليها بالخط العريض أسم (أبو لطفي) ، وحين رفع يده فوق الشق ليدلي بدلوه ، انتصب أمامه ( أبو فهمي ) غامزاً لامزاً مبتسماً .
ومن هول المفاجأة صرخ أبو جدعان بأعلى صوته : (أبشر لعيونك يا أبو فهمي)
ثم رمى ورقة أبو لطفي في الصندوق!
....نزار محمد شجاع ...........................................................